Hanuman Chalisha

श्रीगुरु चरन सरोज रज निज मन मुकुर सुधारि | बरनऊं रघुबर बिमल जसु जो दायक फल चारि || बुद्धिहीन तनु जानिके सुमिरौं पवनकुमार | बल बुधि विद्या देहु मोहिं हरहु कलेश विकार || जय हनुमान ज्ञान गुन सागर, जय कपीस तिहुँ लोक उजागर || रामदूत अतुलित बल धामा, अंजनि-पुत्र पवनसुत नामा || महाबीर विक्रम बजरंगी, कुमति निवार सुमति के संगी || कंचन बरन बिराज सुबेसा, कानन कुण्डल कुँचित केसा || हाथ वज्र और ध्वजा विराजे, काँधे मूँज जनेऊ साजे || जय हनुमान ज्ञान गुन सागर, जय कपीस तिहुँ लोक उजागर || शंकर सुवन केसरी नंदन, तेज प्रताप महा जग वंदन || विद्यावान गुनी अति चातुर, राम काज करिबे को आतुर || प्रभु चरित्र सुनिबे को रसिया, राम लखन सीता मन बसिया || सूक्ष्म रूप धरि सियहिं दिखावा, विकट रूप धरि लंक जरावा || जय हनुमान ज्ञान गुन सागर, जय कपीस तिहुँ लोक उजागर || भीम रूप धरि असुर सँहारे, रामचन्द्र के काज सँवारे || लाय सजीवन लखन जियाये, श्रीरघुबीर हरषि उर लाये || रघुपति कीन्ही बहुत बड़ाई, तुम मम प्रिय भरतहि सम भाई || सहस बदन तुम्हरो जस गावे, अस कहि श्रीपति कंठ लगावे || जय हनुमान ज्ञान गुन सागर, जय कपीस तिहुँ लोक उजागर || सनकादिक ब्रह्मादि मुनीसा, नारद सारद सहित अहीसा || जम कुबेर दिगपाल जहाँ ते, कवि कोविद कहि सके कहाँ ते || तुम उपकार सुग्रीवहिं कीन्हा, राम मिलाय राजपद दीन्हा || तुम्हरो मन्त्र विभीषन माना, लंकेश्वर भए सब जग जाना || जय हनुमान ज्ञान गुन सागर, जय कपीस तिहुँ लोक उजागर || युग सहस्र जोजन पर भानू, लील्यो ताहि मधुर फल जानू || प्रभु मुद्रिका मेलि मुख माहीं, जलधि लाँघि गये अचरज नाहीं || दुर्गम काज जगत के जेते, सुगम अनुग्रह तुम्हरे तेते || राम दुआरे तुम रखवारे, होत न आज्ञा बिनु पैसारे || जय हनुमान ज्ञान गुन सागर, जय कपीस तिहुँ लोक उजागर || सब सुख लहै तुम्हारी सरना, तुम रक्षक काहू को डर ना || आपन तेज सम्हारो आपे, तीनों लोक हाँक तें काँपे || भूत पिशाच निकट नहिं आवै, महाबीर जब नाम सुनावै || नासै रोग हरै सब पीरा, जपत निरंतर हनुमत बीरा || जय हनुमान ज्ञान गुन सागर, जय कपीस तिहुँ लोक उजागर || संकट से हनुमान छुड़ावै, मन क्रम वचन ध्यान जो लावै || सब पर राम तपस्वी राजा, तिनके काज सकल तुम साजा || और मनोरथ जो कोई लावै, सोई अमित जीवन फल पावै || चारों युग परताप तुम्हारा, है प्रसिद्द जगत उजियारा || जय हनुमान ज्ञान गुन सागर, जय कपीस तिहुँ लोक उजागर || साधु संत के तुम रखवारे, असुर निकन्दन राम दुलारे || अष्ट सिद्धि नौ निधि के दाता, अस बर दीन जानकी माता || राम रसायन तुम्हरे पासा, सदा रहो रघुपति के दासा || तुम्हरे भजन राम को पावै, जनम जनम के दुख बिसरावै || जय हनुमान ज्ञान गुन सागर, जय कपीस तिहुँ लोक उजागर || अन्त काल रघुबर पुर जाई, जहाँ जन्म हरिभक्त कहाई || और देवता चित्त न धरई, हनुमत सेई सर्व सुख करई || संकट कटै मिटै सब पीरा, जो सुमिरै हनुमत बलबीरा || जय जय जय हनुमान गोसाईं, कृपा करहु गुरुदेव की नाईं || जय हनुमान ज्ञान गुन सागर, जय कपीस तिहुँ लोक उजागर || जो शत बार पाठ कर कोई, छूटहि बंदि महा सुख होई || जो यह पढ़ै हनुमान चालीसा, होय सिद्धि साखी गौरीसा || तुलसीदास सदा हरि चेरा, कीजै नाथ हृदय महँ डेरा || पवनतनय संकट हरन, मंगल मूरति रूप | राम लखन सीता सहित, हृदय बसहु सुर भूप ||